English
Māori

ʻOku ʻi ha tuʻunga fakatuʻutāmaki nai ho vā mo ha tokotaha ʻoku mo feohi mo ia pe ko ha tokotaha kehe ʻokú ke ʻiloʻi?

Ko e meʻa ke fakahokó kapau ʻokú ke fehangahangai mo ha fakatuʻutāmaki ʻoku tuʻunuku atu

Kapau ʻoku ʻi ha tuʻunga fakatuʻutāmaki ʻa hoʻo moʻuí, ko hoʻo malu mo haó ʻa e meʻa mahuʻinga tahá. Telefoni ki he kau Polisí pe ko ha taha ʻokú ke falala ki ai ke tokoni atu ke maluʻi koe.

Taila ʻa e 111 pea kole ke fakafetuʻutaki ko e ki he kau Polisí ʻE tokoni haʻo talaange ki he tokotaha ʻokú ke lea ki aí ʻa e lea fakafonua ʻokú ke lea ʻakí ʻo ngāueʻaki ʻa hono ui faka-Pilitāniá ke malava kenau tokoni atu.

Kapau ʻoku ke ongoʻi ʻe fakatuʻutāmaki ke ke lea, lomiʻi ʻa e 55. Fakafanongo ki he ngaahi fakahinohinó. Ko ʻene aʻu pē hono fakafehokotaki koé, ʻe ʻeke atu leva ʻe he tokotaha ʻokú ke lea ki aí ha ngaahi fehuʻi ke ke tali ʻio pe ʻikai ki ai, pea ʻe kole atu leva ke ke tali mai ʻaki hano lomiʻi ʻa e ngaahi foʻi kī ʻi hoʻo telefoní.

Telefoni ki ha tokotaha ʻokú ke falala ki aí ke tokoni atu ki hono maluʻi koé

Telefoni ki he Laini Fakamatala ki he Tā Fakamamahi ʻi he Fāmili ʻi he fika 0800 456 450 ʻa ia ʻe ʻoatu ai ʻe he niʻihi kuo akoʻi fakapalofesinale ha fakamatala mo ha tokoni, ke ke lava ai ʻo fili ʻa e meʻa ke ke fakahokó, kau ai mo hano maʻu atu ʻo ha tokoni ʻi ho feituʻú. ʻOku lava ʻa e laine telefoni ko ʻení ʻo fakakau mai ha kau fakatonulea.

Ko e anga eni ʻo e hā mai pe ko hono ongoʻi ʻo ha tā mo e fakamamahi ʻi he fāmilí

ʻOku ʻikai ngata pē ʻa e uesia ʻo e tā mo e fakamamahi ʻi he fāmilí ʻi he fakamamahi fakaesinó. ʻOku kau foki ki ai moe mamahi ʻo e lotó, uesia ʻe he ngaahi leá, uesia fakaeʻatamai, pea moe ngaahi koviʻi ʻaki ʻa e ngaahi tōʻonga fakalielia mo fakapaʻanga foki.

ʻOku anga maheni pē ke fakakaukau ʻa e niʻihi ʻoku nau ʻi ha ngaahi vā feohi ʻoku fakamamahiʻi ki he ngaahi meʻa hangē ko e:

  • "ʻOku ʻikai ke hoko maʻu pē, ʻoku nau kei ʻofa pē ʻiate au"
  • "ʻOku ou ongoʻi ʻo hangē ʻoku nau vaʻinga ʻaki hoku ʻatamai—ʻoku ou fuʻu puputuʻu ʻaupito"
  • "Ko e meʻa anga maheni pē ʻeni ʻi he anga ʻo e nofo malí"
  • "Ko hoku husepānití ia pea ʻoku ʻi ai pē ʻene totonu ʻaʻana ki ai"
  • "ʻOku ou ilifia ki he meʻa ʻe hokó kapau teu mavahe" pe
  • "Mahalo ko hoku foʻui pē ʻoʻ"

ʻOku ʻikai totonu ke tukuakiʻi koe — ʻoku ʻikai ke ke ʻai ke fakamamahiʻi koe ʻe ha taha, pea ʻoku totonu ke ke malu mo ongoʻi malu.

Ngaahi Lao fekauʻaki mo e Tā mo e Fakamamahi ʻi he Fāmilí ʻi Nuʻu Silá ni.

Ko e tā mo e fakamamahi ʻi he fāmilí ko ha hia ia ʻi Nuʻu Silá ni pea ko e maumau lao ia ke fakamamamahiʻi fakaesino, ʻi he lea, ʻi he tōʻonga fakalielia pe fakaeʻatamai ʻe ha taha ha tokotaha kehe. ʻOku kau ki heni ʻa e aʻusia, sio tonu pe fanongo ʻa e fānaú ki he ngaahi faʻahinga ko eni ʻo e fakamamahí.

ʻE lava ke kau ki he fakamamahi ko ení ha meʻa naʻe hoko tuʻo taha pe ngaahi meʻa naʻe toutou hoko ʻo aʻu ki ha tuʻunga ʻoku hoko maʻu pē (ʻo tatau ai pē kapau ʻe hā ngali siʻisiʻi pe taʻemahuʻinga ʻa e kotoa pe ha faʻahinga meʻa naʻe hoko ʻi he taimi naʻe fai ai ki ai ha sio ʻi haʻane hoko tuʻo taha pe hoko maʻu pē).

ʻE ala hoko ʻa e fakamamahi ko ʻení ko ha fakamālohi pe puleʻi (controlling) pea/pe te ne fakatupu ai ha uesia ʻo taulōfuʻu ki he tokotaha ko iá.

Ko e hia foki ʻi Nuʻu Silá ni mo e fakamamahi ʻoku fekauʻaki mo e foaki koloá pea ʻoku kau ki ai ʻa e fakamamahi koeʻuhi ko e ngaahi koloa ʻoku foaki pe maʻu mai ʻi he ngaahi fefoakiʻaki ʻi he malí pe teuteu ʻo ha mali.

ʻOku mahino kiate kimautolu ko ha tūkunga fakatupu mafasia mo fakailifia eni, ka ʻoku ʻi ai pē ha ngaahi tokoni ofi atu. Kumi ki ha tokoni pe kole atu ha fakamatala lahi ange.

Feituʻu ke maʻu mei ai ha tokoni

Fakamatala ki he Tā mo e Fakamamahi ʻi he Fāmilí – Fika 0800 456 450 ʻAtā atu ʻi he houa ʻe 24 ʻo e ʻaho kotoa pē (24/7) ki he niʻihi kuo akoʻi fakapalofesinale ʻa ia te nau ʻoatu ha fakamatala mo ha tokoni, ke ke lava ai ʻo fili ʻa e meʻa ke ke fakahokó, kau ai mo hano maʻu atu ha tokoni ʻi ho feituʻú. ʻOku lava ʻa e laine telefoni ko ʻení ʻo fakakau mai ha kau fakatonulea.

NCIWR – 0800 REFUGE (0800 733 843) Tokoni houa 24 ʻi he ʻaho kotoa pē (24/7) ki he kakai fefine mo e fānau ʻoku nau aʻusia ʻa e tā mo e fakamamahi ʻi he fāmilí, kau ai ʻa e ngaahi tokoni fekauʻaki mo e taukapo mo e nofoʻangá.

Shine – 0508 744 633 Tokoni fakapulipuli houa 24 he ʻaho kotoa pē (24/7) ki he kakai ʻoku nau aʻusia ʻa e tā mo e fakamamahi ʻi he fāmilí pe pāʻusiʻí pē hohaʻa ki ha tokotaha kehe, mo e kakai ʻoku nau ngāueʻaki ʻa e fakamamahí ka ʻoku nau fiemaʻu ke nau liliu. Te nau toe lava foki ʻo fakafehokotaki koe mo ha toe ngaahi tokoni kehe ʻo kapau te ke fiemaʻu kinautolu.

Shakti – 0800 SHAKTI (0800 742 584) Laini telefoni tokoni houa 24 he ʻaho kotoa pē (24/7) ʻi he ngaahi lea fakamatakali kehekehe ki he kakai fefine kuo taumuʻa valea e moʻuí pe ʻoku nau fiemaʻu ha fakamatala fakavavevave pe maʻá kinautolu ʻoku nau ʻilo ha tokotaha ʻoku tofanga ʻi ha tā mo e fakamamahi ʻi hono fāmilí pea ʻoku fiemaʻu tokoni.